තවත් ක්‍රිකට් ලෝක කුසලානයක් කල් යයි

13

2022 අයි.සී.සී කාන්තා පන්දුවාර 20යි 20 ලෝක කුසලාන ක්‍රිකට් තරගාවලිය මාස 3කින් කල් දැමීමට ජගත් ක්‍රිකට් කවුන්සලය තීරණය කර තිබෙනවා.

ඒ අනුව තරගාවලිය 2023 වසරේ පෙබරවාරි මාසයේ දකුණු අප්‍රිකාවේ දී පැවැත්වීමටයි සැලසුම් කර ඇත්තේ.

නවසීලන්තයේ පැවැත්වීමට නියමිතව තිබූ 2021 කාන්තා එක්දින ලෝක කුසලාන ක්‍රිකට් තරගාවලිය කොරෝනා වසංගතයේ බලපෑම හේතුවෙන් 2022 වසර දක්වා කල් දැමීමට සිදු වීම පදනම් කර ගනිමින් මෙම තීරණය ගෙන තිබෙනවා.

2022 වසරේ දී ජාත්‍යන්තර කාන්තා තරගාවලි තුනක් පැවැත්වීමට නියමිත බැවින්, ඉන් එක් තරගාවලියක් වූ 20යි 20 ලෝක කුසලානය මෙලෙස මාස 3කින් කල් දැමීමටයි පියවර ගෙන ඇත්තේ.

නව තරග කාලසටහනට අනුව 2022 වසරේ දී පැවැත්වෙන්නේ කාන්තා එක්දින ලෝක කුසලාන ක්‍රිකට් තරගාවලිය සහ පොදු රාජ්‍ය මණ්ඩලීය ක්‍රීඩා උළෙලේ කාන්තා ක්‍රිකට් තරග ඉසව්වයි.

මීට පෙර 2023 වසරේ දී කිසිදු ගෝලීය මට්ටමේ කාන්තා ක්‍රිකට් තරගාවලියක් පැවැත්වීමට සැලසුම් කර තිබුණේ නැහැ.

Your Comments