ශ්‍රී ලංකන් ගුවන් සේවය යළි ‘වෙලාවෙන්’ ලොව පළමු තැනට එයි

46

මාස 12කට අඩු කාලයකදී දෙවැනි වරටත් ලොව වඩාත්ම, නියමිත වේලාවට මෙහෙයුම් වැඩි වශයෙන් සිදුකළ ගුවන් සමාගම ලෙස ශ්‍රී ලංකන් ගුවන් සේවය තේරී පත්වී තිබෙනවා.

ඒ අනුව ශ්‍රී ලංකන් ගුවන් සේවය පසුගිය මැයි මාසයේ දී සියයට 90.75ක ගුවන් ගමන් මෙහෙයුම් නිසි වේලාවට සිදුකර ඇති බව සඳහන්.

පසුගිය වසරේ සැප්තැම්බර් මාසයේ දී ද ශ්‍රී ලංකන් ගුවන් සේවය 91.37ක ප්‍රතිශතයක් වාර්තා කරමින් ලොව වැඩි වශයෙන් නියමිත වේලාවට මෙහෙයුම් සිදුකිරීමේ ගුවන් සේවය බවට පත්ව තිබුණා.

මේ සම්බන්ධයෙන් අදහස් දක්වමින් ශ්‍රී ලංකන් ගුවන් සමාගමේ ප්‍රධාන විධායක නිලධාරී විපුල ගුණතිලක මහතා ප්‍රකාශ කළේ ගුවන් සේවය නියමිත වේලාවට පැමිණීම හා නියමිත වේලාවට පිටත්වීමෙන් ගනුදෙනුකරුවන් ඉමහත් ප්‍රීතියට පත්ව ඇති බවයි.

තවද මෙම ජයග්‍රහණය සඳහා කාර්ය මණ්ඩලය නිරන්තරයෙන් කැපවීමෙන් ඔවුන්ගේ කාර්යභාර්ය ඉටු කළ බවත් ගුවන් සේවා කණ්ඩායම වෙත සුබපැතුම් පිරිනමන බවත් හෙතෙම වැඩිදුරටත් සඳහන් කළා.

ශ්‍රීලංකන් ගුවන් සමාගමේ කේන්ද්‍රස්ථානය වන කොළඹ බණ්ඩාරනායක ජාත්‍යන්තර ගුවන්තොටුපළේ ආරක්ෂාව ඉහළ නංවා ඇති අවස්ථාවක මෙම ජයග්‍රහණය හිමිවීම විශේෂත්වයක්.

දුෂ්කර කාල පරිච්ජේදයක පවා තම ගනුදෙනුකරුවන්ට විශිෂ්ටතම සේවාවක් සැපයීම තුළින් ජාතික ගුවන් සේවයේ අසාමාන්‍ය කැපවීම පැහැදිලිව පෙන්නුම් කරන බවයි එම සමාගම පෙන්වා දෙන්නේ.

ගුවන් යානා දත්ත විශ්ලේෂණය කරන සමාගම විසින් (www.flightstats.com) නිරීක්ෂණය කරනු ලැබූ සියලු ගුවන් සමාගම් අතරින් ශ්‍රී ලංකන් ගුවන් සේවය ‘ගෝලීය ගුවන් සේවා’ සහ ‘ප්‍රමුඛ ගුවන් සේවා ‘ යන කාණ්ඩ දෙක යටතේ ප්‍රථම ස්ථානයට තේරීපත් වූවා.

යුරෝපය, උතුරු ඇමරිකාව, ආසියාව, මැදපෙරදිග සහ දකුණු ඇමරිකාව වැනි ලොව විශාලතම සහ ගෞරවනීය ගුවන් සේවා මේ යටතේ විශ්ලේෂණය කර තිබෙනවා.

මෙම ගුවන් සේවා කලාපීය ගුවන් සේවා, පිරිමැසුම් ගුවන් සේවා, ගෝලීය ගුවන් සේවා සහ ප්‍රධාන ගුවන් සේවා යන කාණ්ඩ යටතේ වර්ග කර ඇති අතර ඇතැම් ගුවන් සේවා මෙවැනි කාණ්ඩ කිහිපයකටම අයත් වෙයි.

‘ගෝලීය ගුවන් සේවා’ කාණ්ඩය යටතේ දෙවැනි ස්ථානයට බ්‍රසීලයේ LATAM ගුවන් සමාගම සහ තුන්වන ස්ථානයට ජපානයේ All Nippon ගුවන් සේවය තේරී පත්ව සිටී.

‘ප්‍රධාන ගුවන් සේවා’ කාණ්ඩය යටතේ දෙවැනි ස්ථානය All Nippon ගුවන් සේවය සහ එහි තෙවෙනි ස්ථානයට GoAir තේරී පත්වුණා.

2019 මැයි මාසයේ දී ගුවන් සමාගම්වල කාර්යසාධනය පිළිබඳ සම්පූර්ණ ලැයිස්තුවක් පහත සඳහන් වෙබ් ලිපිනය ඔස්සේ ලබාගත හැකිය.

https://www.flightstats.com/v2/monthly-performance-reports/airlines

පසුගිය මාස 12 තුළ ශ්‍රීලංකන් ගුවන් සමාගම නිරන්තරයෙන්ම ලොව වැඩි වශයෙන් නියමිත වේලාවට මෙහෙයුම් සිදුකරන ගුවන් සේවා අතරින් එකක් වූ අතර, එය 2018 ජූනි මස සිට 2019 මැයි දක්වා කාලය තුළ ගුවන් ගමන් පිටත් වීමේ සාමාන්‍ය 86%ක් සහ ගුවන් ගමන් යානා පැමිණීමේ සාමාන්‍ය 85% විය.

මෙම කාර්යක්ෂමතාව ගුවන් සේවාවේ මූල්‍යමය පසුබිම සඳහා මෙය සැලකිය යුතු ලෙස දායකත්වයක් ලබා දුන් අතර ගුවන් සේවා ප්‍රමාදයන් හේතුවෙන් වැය වන අමතර වියදමද අඩු කර ගැනීමට හැකිව තිබෙනවා.

ශ්‍රී ලංකන් ගුවන් සමාගම විසින් නිසි වේලාවට මෙහෙයුම් සිදුකිරීමේ කාර්ය සාධනයක් වාර්තා කර ඇත්තේ එහි සියලු දෙපාර්තමේන්තු සහ පුද්ගල කාර්ය මණ්ඩල සාමාජිකයින් වගකියනු ලබන විවිධ පැතිකඩයන් හි මෙහෙයුම් කාර්ය සාධනය ව්‍යුහගත ක්‍රියාවලියක් තුළින් අධීක්ෂණය සහ සම්බන්ධීකරණය කිරීමට කටයුතු කරනු ලබන නිසාය.

ශ්‍රී ලංකන් ගුවන් සමාගම වත්මන්හි රටවල් 48 ගමනාන්ත 111ක් වෙත සිය ගුවන් මෙහෙයුම් සිදුකරයි.

වන්වර්ල්ඩ් ගෝලීය ගුවන් සේවා සන්ධානයේ සාමාජික ගුවන් සේවාවක් වශයෙන් වන්වර්ල්ඩ් පාර්ශව ගුවන් සේවා හරහා රටවල් 160 ගමන්නාත 1000 දක්වා පියාසර කිරීමේ පහසුකම ශ්‍රී ලංකන් ගුවන් මගීන්ට හිමිවේ.

එසේම ශ්‍රී ලංකන් ගුවන් සමාගම ලෝක සංචාරක සම්මාන උළෙලෙහි දී (World Travel Awards) ඉන්දියානු සාගර කලාපය වෙත පියාසර කරන ලොව ප්‍රමුඛතම ගුවන්සේවය (World’s Leading Airline to the Indian Ocean) ලෙස සම්මානයට පාත්‍ර වී ඇත.

ශ්‍රී ලංකන් ගුවන් සමාගම ආසියා සහ ඕස්ට්‍රලේෂියා ලෝක සංචාරක සම්මාන උළෙලේ දී (World Travel Awards Asia and Australasia) ඉන්දියානු සාගර කලාපය වෙත පියාසර කරන ආසියාවේ ප්‍රමුඛතම ගුවන් සේවය ලෙස ද සම්මානයට පාත්‍ර වූ බව ශ්‍රී ලංකන් ගුවන් සමාගමේ ආයතනික සන්නිවේදන අංශය සඳහන් කළා.

 

Your Comments