බාහිර කැපුම් නොමැති ගෙලෙහි සැත්කම

 02/08/2018 - 18:04
213 reads

ඉතිහාසයේ ප්‍රථම වරට ගෙලෙහි බාහිර කැපුම් නොමැතිව සිදුකරන ට්‍රාන්ස්ඔවරල් ලැපරස්කොපික් තයිරොඩෙක්ටමි (Transoral endoscopic thyroidectomy) නැමැති සැත්කම අති සාර්ථකව (08) සිදුකළ බව කුලියාපිටිය මූලික රෝහල් උගුර කන නාසය පිළිබඳව විශේෂඥ වෛද්‍ය රිස්නි සක්කාෆ් මහතා පවසනවා.

කුලියාපිටිය උඩුබද්දාව ප්‍රදේශයේ 60 හැවිරිදි කාන්තාවක් එසේ ප්‍රථම සැත්කමට භාජනයවූ අතර සැත්කමෙන් අනතුරුව ඇය යහපත් සොෟඛ්‍ය තත්වයෙන් පසුවනවා.

කුලියාපිටිය මූලික රෝහල් ඉතිහාසයේ පමණක් නොව තම දැනුමේ තරමින් දිවයිනේ වෙනත් රෝහලක මෙම සැත්කම සිදුකර නොමැති අතර දකුණු ආසියාවේ ස්ථාන කිහිපයක පමණක් සිදුකර ඇති මෙම සැත්කම ඉන්දියාවේ පවා සිදුකර ඇතිතේ මීට මාස 10කට ඉහතදී බවට තොරතුරු ඇති බවත් ඒ අනුව අදාළ සැත්කම දකුණු ආසියාවේ සිව්වැනි වරට සිදුකළ අවස්ථාව මෙය බවට ඉතිහාසගතවන බවත් වෛද්‍ය රිස්නි මහතා පෙන්වා දෙයි.

ඒ මහතා වැඩිදුරටත් පැවසුවේ සාමාන්‍යයෙන් සෑම අයෙකුම ගෙලෙහි කැපුම් යොදා සිදුකරන සැත්කම් වලින් හටගන්නා කැලැල් හේතුවෙන් ඇතිවන බාහිර පෙනුමේ අවලක්‍ෂණ ස්වභාවයට අකමැති බැවින් මෙම සැත්කම සිදුකිරීමෙන් අනතුරුව රෝගියා නිර්වින්දනයෙන් මිදුන පසු අවම වේදනාවකින් හා අවම රුධිර වහනයකින් සිදුකළ හැකි අතර ගෙල ප්‍රදේශයේ කැපුම් තුවාල කැලැල් ඇති නොවන බවයි.

පුරා පැය 4කට ආසන්න කාලයකදී අති සාථක අති සාර්ථක අයුරින් තයිරොයිඩ්  ග්‍රන්ථියේ ඉදිමුන කොටස ඉවත් කිරීමට හැකිවූ අතර වෛද්‍ය රිස්නි මහතා පවසන්නේ තාක්‍ෂණික දෝෂ බොහොමයක් නොතිබෙන්නට ඉතා සුලු වේලාවකින් අදාල ශෛල්‍ය කර්මය සිදුකළ හැකි බවයි.

කුලියාපිටිය මූලික රෝහලේ වෛද්‍ය අධිකාරි අයි.එස්. යද්දෙහිගේ මහත්මිය ඇතුලු විශේෂඥ වෛද්‍ය කාර්යමණ්ඩලය, වෛද්‍ය කාර්යමණ්ඩලය, හෙද හා කණිෂ්ඨ කාර්යමණ්ඩලය මෙලෙස ලංකාවේ ප්‍රථම වරට කොළඹින් පිටතදී සිදුකරන සැත්කමක් වුවත් ඊට අවදානම නොගෙන තමන් පිළිබඳව විශ්වාසය තබා දැක්වූ සහය මෙම සැත්කම සාර්ථකව සිදුකිරීමට ශක්තියක් වූ බවද විශේෂඥ වෛද්‍ය රිස්නි සක්කාෆ් මහතා පවසනවා.

(කුලියාපිටිය - ප්‍රසාද් පූර්ණිමාල් සහ  දිනේෂ් උපේන්ද්‍ර)     

 

news24.lk
News24
sri lanka news 24
24 news
TRANSORAL LAPAROSCOPIC THYROIDECTOMY