කට වරද්දාගෙන හිරේට ගිය සුරූපිණිය

48

ඊජිප්තුවට අපහාස කරමින් Facebook වීඩියෝවක් පළ කිරීම සම්බන්ධයෙන් වරදකාරියක වූ ලෙබනන් කාන්තාවකට කයිරෝ අධිකරණය වසර 08ක සිර දඬුවමක් නියම කර තිබෙනවා.

මෝනා එල්- මාස්බෝහ් නමැති 24 හැවිරිදි අදාළ කාන්තාව පසුගිය මාසයේ අත්අඩංගුවට ගෙන තිබුණේ, කයිරෝ ගුවන්තොටුපොළේදී යි.

ඊජිප්තු සංචාරය අතරතුර තමා ලිංගික හිරිහැර කිරීම්වලට ලක් වූ බවට චෝදනා කරමින් විනාඩි 10ක් පුරා දිවෙන අදාළ වීඩියෝව ඇය සිය Facebook ගිණුමේ පළ කර තිබෙනවා.

24 හැවිරිදි අදාළ කාන්තාව පැමිණිලි කර ඇත්තේ, තමා ඊජිප්තුවේ සංචාරයේ නිරතව සිටියදී ටැක්සි රියැදුරෙකු සහ තරුණයින් කිහිප දෙනෙකු අතින් තමාට හිරිහැර සිදුවූ බවයි.

එමෙන්ම ආපනශාලාවල දුර්වල සේවා සැපයීම මෙන් ම තමාගේ මුදල් නැති වූ බවට ද ඇය සිය වීඩියෝව ඔස්සේ චෝදනා කර සිටින බවයි විදෙස් මාධ්‍ය වාර්තා කර සිටියේ.

ඇය සිය කෝපාවිශ්ට ප්‍රකාශය තුළින් ඊජිප්තුව පහත් දුසිරිතෙන් පිරි රටක් බව ත් එහි පිරිමින් ගණිකාවන් සපයන්නන් බවට ත් ගැහැනුන් ගණිකාවන් බවටත් අපහාස කර ඇතැයි, විදෙස් මාධ්‍ය වාර්තා කර සිටින්නේ.

කෙසේ වෙතත් ඇය පසුගිය අවුරුදු 04 ඇතුළත කිහිපවතාවක් ම ඊජිප්තුවේ සංචාරය කර ඇති කාන්තාවක් බව ද සඳහන්.

හිතාමතාම අසත්‍ය කටකතා පැතිරවීම තුළින් සමාජයට හානියක් සිදුව ඇති බව ත් මෙමගින් ආගමික බලපෑම්, අසමගිය වර්ධනය වන බවටත් පවසමින් කයිරෝ අධිකරණය ඇයට මෙම සිර දඬුවම නියම කර තිබෙනවා.

කෙසේ වෙතත් අදාළ කාන්තාව තමාට නියම වූ දඬුවම සම්බන්ධයෙන් අභියාචනයක් ගොනු කර ඇති අතර අදාළ කාන්තාවගේ නීතිඥයා පවසා ඇත්තේ, සිය සේවාදායිකාව ආතතියෙන් පෙළෙන තැනැත්තියක බවයි.

මේ අතර 2006 වසරේ ඇය මොළයේ ලේ කැටියක් ඉවත් කිරීමේ ශල්‍යකර්මයකට භාජනය කර ඇති බව ත් ඒ හේතුවෙන් ඇයට කෝපය පාලනය කර ගැනීමේ අපහසුතාවක් පවතින බවත් ඇයගේ නීතිඥවරයා අභියාචනය ගොනු කරමින් අධිකරණයට දැනුම් දී ඇතැයි සඳහන්.

ඊජිප්තු කාන්තාවන් අදාළ වීඩියෝව සිය ගිණුම්වල ද පළ කරගනිමින් ඊට විරෝධය පළ කිරීම හරහා එය සමාජ ජාල ඔස්සේ ප්‍රචලිත වී තිබෙනවා.

කෙසේ වෙතත් අදාළ කාන්තාව අත්අඩංගුවට ගැනීමට දිනකට පෙර ඇය ඊජිප්තු වැසියන්ගෙන් සමාව අයදිමින් තවත් වීඩියෝවක් පළ කර ඇති බවයි වාර්තා වන්නේ.

මේ අතර ඊජිප්තු ක්‍රියාකාරීන් පවසන්නේ, Abdel Fattah el-Sisiගේ පාලනය යටතේ ඊජිප්තුව තුළ අතිශය නරක කඩාවැටීමක් සිදුවෙමින් තිබෙන බවයි.

තවද හොස්නි මුබාරක්ගේ 30 අවුරුදු පාලන සමය අවසන් කරමින් 2011 වසරේ අරාබි වසන්තයෙන් ලබා ගත් ජයග්‍රහණ මකා දමමින් සිටින බවටත් ජනාධිපතිවරයාට චෝදනා එල්ල වෙමින් තිබෙනවා.

තිළිණි ද සිල්වා

Your Comments